ખાદી અને ગાંધી ટોપી

સત્યાગ્રહના દિવસો હતા. મુંબઇના લેમિંગ્ટન રોડ પર પોલીસ સ્ટેશન પાસે સત્યાગ્રહીઓનું એક ટોળું આવ્યું. એ ભીડમાં એક યુવતી હતી. પોતાના શરીર પરનાં ઘરેણાં એણે ઉતાર્યાં. બાજુવાળા એક ભાઇના હાથમાં એ મૂક્યાં. પોતાનું નામ-સરનામું આપ્યું અને કહ્યું : ‘આટલાં ઘરેણાં મારા ઘરે પહોંચાડી દેશો અને કહેજો કે હું સત્યાગ્રહમાં જાઉં છું.’

પેલા ભાઇએ સવાલ કર્યો : બહેન, આપણે તો કોઇ ઓળખાણ પણ નથી ને આ ઘરેણાં હું તમારા ઘરે પહોંચાડી દઇશ એવો ભરોસો કેવી રીતે રાખો છો?

‘તમારા શરીર પર ખાદી ને માથે ગાંધીટોપી છે ને, એટલે.’