યાદોની હેલી

તારી યાદો છે કે વરસાદની હેલી,

એક જ ઝાપટે ભીંજાઈ મારાં મનની ડેલી,

નેવેથી જેમ વહે જલધાર,

નેણેથી એમ વહે મનનો ભાર,

તારી યાદોનાં વાદળ ફરી વળે ઘેરી,

એક જ ઝાપટે ભીંજાઈ મારાં મનની ડેલી,

વીજળી કરે જોને કેવો ચમકારો !

એવો તારી યાદોનો થાય ઝબકારો,

મારામાં શ્વસે તારી એકએક વાત કહેલી,

એક જ ઝાપટે ભીંજાઈ મારાં મનની ડેલી,

આકાશે થાય કેવો ગડગડાટ !

યાદ આવે તારાં વિરહની હર એક રાત,

કેટલાય ડૂમા લીધા હતાં સંકેલી,

એક જ ઝાપટે ભંજાઈ મારાં મનની ડેલી,

હેલી, ઝાકળ કે હોય ઝાંઝવા નીર,

ભીંજાવાતૂર મારાં ઉરની જમીન,

આ ચાતકને તરસાવે ઢગોની અટખેલી,

એક જ ઝાપટે ભીંજાઈ મારાં મનની ડેલી.