માતૃભાષા ગુજરાતી

વટથી કહો,

મારી માતૃભાષા ગુજરાતી,

પીધાં ગામેગામનાં પાણી,

ચાખ્યાં સહુનાં ભાષા ને વાણી,

પણ મારાં દિલની એક જ રાણી,

મારી માતૃભાષા ગુજરાતી,

માની ગળથૂથીથી મળી

રુધિર બની મુજમાં વહી,

માનો પ્રેમ બની ઉભરાણી,

 મારી માતૃભાષા ગુજરાતી,

મૌનની ભાષા કે ઉદ્દગારની વાણી,

શબ્દો એના મીઠાં જાણે ગોળધાણી,

મનોભાવની એ એક જ સરવાણી,

મારી માતૃભાષા ગુજરાતી,

ગાંધી, નર્મદ કે મેઘાણી,

ભાષાનાં વૈભવની કરી સાચવણી,

મોંઘેરી એ જણસની કરશું વધામણી,

મારી માતૃભાષા ગુજરાતી,

મનથી ગુજરાતી, તનથી ગુજરાતી,

રહેશું રોમેરોમ વચનથી ગુજરાતી,

સદા રહીશું અમે એનાં જ બંધાણી,

મારી માતૃભાષા ગુજરાતી.