વતનની આવે યાદ

હાલને ભેરુ જઈએ ગામડે, વતનની આવે યાદ,

દાદા-દાદીની એ વાતો..! સખાનો ન ભૂલાય સાથ.

વહેલી સવારે વલોણા, ધોરીડાના વાગે ઘૂઘરાઓ,

પોશાકે અવ-નવા બીજની થેલીના થીંગડાઓ.

શાળાના એ સંસ્મરણો ને, તહેવારોનો એ ઉમંગ,

વિવાહ કે હોય મલાજો, સૌના તન મન એક રંગ.

ગીલી દંડોને આંબલીપીંપળીની રમાતી એ રમતો,

તળાવનું એ સ્નાન, ને ખેતરની અંધારી એ રાતો.

બોરની એ મીઠાશ કે આંબાની હોય એ કાચી કેરી,

એક બીજાનો સહવાસ ને, સૌની હોય શેરી.

શ્રાવણે થાય રામાયણ- મહાભારતની કથાઓ,

એક બીજાના સહારે જીવતા, સૌ વૃધ્ધને માતાઓ.

બીજાના દુઃખે દુઃખી, ને સુખમાં સૌ ભાગીદાર,

માન, મોભો ને આવકારના સૌ કોઈ જાગીદાર.