વિધવા ભાગ-6 નણંદ-ભાભી

(રાગ-મારા મહીસાગરના આરે ઢોલ વાગે છે...)

મારી ભાભલડી ઉપર હું પ્રાણ ફના કરું,

ફીદા કરું પ્રાણ ફના કરું; (ર)

મારી ભાભલડી ઉપર હું પ્રાણ ફના કરું.

જે માગે તે હું હાજર કરું,

જીવ માગે તો હું ચરણે ધરું;

એમની ઈચ્‍છા પ્રમાણે ઝોળી ભરું, (ર)

મારી ભાભલડી..

ભોજન માગે તો રસોઈ કરું,

પાણી માગે તો હું તો દૂધ ધરું;

એની નિરાશાને પલમાં હરું, (ર)

મારી ભાભલડી..

એને ખીલવા માટે હું તો ખરું,

એ કહે એટલાં પગલાં ભરું;

બોલીને કદી' હું તો નહિ ફરું, (ર)

મારી ભાભલડી..

               *

મારાં વા'લાં રે નણંદબા શીદ આવું બોલો,

      શીદ આવું બોલો શીદ આવું બોલો; (ર)

મારાં વા'લાં રે નણંદબા શીદ આવું બોલો!

આનંદ કરો ને મસ્‍તીમાં ડોલો,

ખૂંદી વળો તમે મેડી ને મો'લો;

શરણાઈ અને વગાડો ઢોલો, (ર) મારાં વા'લાં...

હું સામાન્‍ય છું શીદ ઊંચી તોલો,

કોઈ મહાનતાથી ન રે તોલો;

સ્‍વભાવ તમારો છે સાવ ભોલો, (ર)

મારાં વા'લાં...

જરા સમજી મનના પડદા ખોલો,

આતમનાં થયેલ બંધ દ્ધાર ખોલો;

કામ કરી જાણું છું, હાથ નથી પોલો, (ર)

મારાં વા'લાં.