વિધવા ભાગ-47 માતાએ ગાયું ગીત
વિધવા ભાગ-47 માતાએ ગાયું ગીત
એક લીલુંડું રમણીય જંગલ હતું,
એમાં જીવન જીવતાં સૌ મઘમઘતું;
એક લીલુંડું રમણીય જંગલ હતું.
તહીં સર્વે ફ્રૂલડાંની ફોરમ આવતી,
સૂરજમુખીનું ફૂલ રહે ચમકતું; એક લીલુંડું ...
ઝાડ પવન સાથે ઝૂલા ઝૂલતાં હતાં,
ઝાડ નમસ્કાર કરતાં કેવું નમતું; એક લીલુંડું...
એક દિન આનંદમાં લહેરાતો હતો,
સૌનું મુખડું દેખાતું હતું મલકતું; એક લીલુંડું...
શુભ અવસર કોઈ ઉજવાતો હતો,
લગ્નગીત સંભળાતું'તું રણઝણતું; એક લીલુંડું...
સિંહરાજા મહેમાન તેમાં બન્યા હતા,
ઓલ્યું સસલું ચાલે છડી પોકારતું; એક લીલુંડું...
પે'લા વાંદરાભાઈ રસોઈયા બન્યા હતા,
ભોજન બનાવ્યું સૌને મનભાવતું; એક લીલુંડું...
સિંહણરાણી ગીતડાં તેમાં ગાતાં હતાં,
આતો હરણ-હરણીનું લગ્ન હતું; એક લીલુંડું...
સુખી થવાનાં દંપતીને આશિષ આપ્યાં,
જીવન સુખી હતું એનું મઘમઘતું; એક લીલુંડું...
બીજાં જંગલની હરણને માયા લાગી,
હરણ હરણીને છોડીને રહ્યું જતું; એક લીલુંડું...
હરણી કંથની વાટલડી જોવા લાગી,
એનું જીવન વિરહમાં જતું વીતતું; એક લીલુંડું.