તું ચમત્કારી કિતાબ લાગે છે

વસંત જેવો તારો રૂઆબ લાગે છે,

મીઠું સ્મિત તારું લાજવાબ લાગે છે !

તારા સંગાથમાં મહેકી છે મારી જાત,

તું જાણે કોઈ સુગંધી ગુલાબ લાગે છે !

તારા આગમને પ્રકાશિત થાય હૈયાનો ઓરડો,

તું જાણે કોઈ દેદીપ્યમાન આફતાબ લાગે છે !

તને પામીને હું બાહોશ શાયર બની ગઈ,

તું જાણે કોઈ ચમત્કારી કિતાબ લાગે છે !

કરે છે હવે સૌ ગણના મારી શ્રીમંતોમાં,

મારી જાત મને હવે નવાબ લાગે છે !

જોઈ તારી એક ઝલક મને ચડે છે નશો,

તારી આંખો જાણે કોઈ શરાબ લાગે છે !

મળી ગઈ જાણે ધરા પર મને જન્નત !

તારો પ્રેમ મારી દુઆનો જવાબ લાગે છે !