સત્ય સવાયું છે

નથી બોલી છતાં દિલ કેમ તારું તો ઘવાયું છે, 

કરી દે માફ દિલ તારું હવેથી ઓળખાયું છે.

વધારે શું કહું આ પ્રેમનો રસ્તો છે કાંટાળો,

એ રસ્તે ચાલવામાં દિલ ઘણુંયે છેતરાયું છે. 

નજર નીચી કરી જોયું જરા ભીતર ઉતરડીને, 

હું સ્વીકારું હવે મારું જ મન થોડું હરાયું છે. 

નિવારણ શોધવામાં હું ઘણું ફરતી રહી જગમાં,

મળ્યું આખર મને મારી જ અંદર જે દટાયું છે. 

કદી ભાસે મને એંધાણ તારા આવવાના ત્યાં, 

ચમનના ફૂલનું જાણે અહીં અત્તર છવાયું છે.

યુગોથી સત્ય પર એક આવરણ કાયમ પડેલું છે, 

છતાંયે સત્ય આખર સત્ય છે સૌથી સવાયું છે.