સરનામું ક્યાં જઈ શોધવું ?

લાગણી તો નજર્યુંમાં કોરેલું ફૂલ, એનું સરનામું ક્યાં જઈ શોધવું ?

વ્હાલ કહું ? પ્રેમ કહું ? કે કહું ઘેલછા ? એને કિયા તે નામે સંબોધવું ?

એનું સરનામું ક્યાં જઈ શોધવું ?

મેઘને તો લાગણીનું પૂછવું જ કેમ ? એ તો વરસી લે મન મૂકી ગેલમાં, 

ઝરણાંની પીઠ પર હાથ મૂકો વ્હાલનો તો ખળખળીયું દોડે ઉકેલમાં,

લાગણીનું પૂછતાં જ ગોરંભી બેસે એ ભીનું આકાશ ક્યાં ઓઢવું ?

એનું સરનામું ક્યાં જઈ શોધવું ?

સાગરને પૂછો તો દિવસ ને રાત એ વેદનાઓ ઉછળતી કાઢે, 

નદીયુંના ખોળામાં ઢાળી દે માથું એ લાગણીના ભીના અષાઢે,

અણસારો આપીને નદીયુંનું યૌવન ભર ચોમાસે કેમનું ગોંધવું ?

એનું સરનામું ક્યાં જઈ શોધવું ?

મહેંકોને પૂછો તો આંગળી કરીને કેવું દેખાડે ફૂલોનું વન !

ભમરો તો અણીયાળી વેદનાથી સૂકવતો હોઠે જડેલું યૌવન,

રેશમની પાંખડીમાં મઘમઘતું-મઘમઘતું વ્હાલભર્યું કેમનું પોંઢવું ?

એનું સરનામું ક્યાં જઈ શોધવું ?

લીલાંછમ ઊભેલા ખેતર ને વાડી ને મસ્તીએ ડોલાતા ઝાડ,

નાનુંશું તરણુંય ઊભું થઈ બેસતું, આ લાગણીને ક્યાં કશી વાડ ?

લીલુંછમ થાવાનું આમ બે ઘડીમાં એને શબ્દોમાં કેમનું ઉદબોધવું ?

એનું સરનામું ક્યાં જઈ શોધવું ?