સરદારનું ગીત-૩૮.
સરદારનું ગીત-૩૮.
બારડોલી સત્યાગ્રહ-૬ (ઈ.સ. ૧૯ર૮)
જુલમો બારડોલીમાં, અતિશય કરાય રે;
એ સરકાર માટે તો, કલંક જ ગણાય રે.
ઘણા ઘણા મહેમાનો, બારડોલી ભરાય રે;
ને સત્યાગ્રહમાં તેઓ, જલ્દી જોડાય રે.
પડે જરૂર નાણાંની, તો એનો થાય ધોધ રે;
નાણાં કે માણસો માટે, નો’તી કરેલ શોધ રે.
તાકાત બારડોલીની, ખૂબ વધી ગયેલ રે;
આ સરકારની તેથી, મૂંઝવણ વધેલ રે.
કરી લેવા સમાધાની, પરિષદ ભરાય રે;
રહી ન શરતો માન્ય, તેથી નિષ્ફળ જાય રે.
ધમકી-લાલચો આપી, વીફરી સરકાર રે;
પ્રોત્સાહન રહે દેતા, લોકોને સરદાર રે.
સત્ય માટે રહેજો સૌ, થઈ જવા ખુવાર રે;
આમ જ જીતનો ડોકે, આવશે ફૂલહાર રે.
જૂઠાણાં-પોકળો પાડે, ઉઘાડાં સરદાર રે;
સરકારી સચાઈના, કાંકરા કરનાર રે.
નોકરી સરકારીનાં, રાજીનામાં અપાય રે;
બારડોલી દિને દેશ, ઉત્સાહમાં સમાય રે.
પ્રાર્થનાઓ કરી સૌએ, કરેલ ઉપવાસ રે;
અવળાં પડતાં પાસાં, સરકાર નિરાશ રે.
વધી લડત લોકોની, વિચારે સરકાર રે;
કર્યા વિના સમાધાન, ઉતરાશે ન પાર રે.
એ માટે શરતો રાખી, જણાવે સરદાર રે;
સત્યાગ્રહી બધા કેદી, છોડી દે સરકાર રે.
બધી ચીજો અને પાછી, જમીનોય અપાય રે;
આપવો ભાવ ચીજોનો, ને સજા માફ થાય રે.
ચૂનીલાલ મહેતાએ, સમાધાની કરેલ રે;
કબૂલ શરતો રાખી, જંગ પૂરો થયેલ રે.
**
ભરી જૂનું મહેસૂલ, પૂર્ણાહુતિ કરાય છે;
ને ગુજરાતના લોકો, હર્ષથી હરખાય છે.
(ક્રમશ:)