હજુ સંભાવનાઓ છે

ઘણું બદલાઈ શકવાની હજુ સંભાવનાઓ છે,

નવું સરજાઈ શકવાની હજુ સંભાવનાઓ છે;

નથી અફસોસ કે સંબંધનું પહેરણ જરા ફાટ્યું!

પુન: સંધાઈ શકવાની હજુ સંભાવનાઓ છે;

પરસ્પર પ્રેમ-નિસ્બત-લાગણી-સદભાવ-સહચર્ય,

બધું સચવાઈ શકવાની હજુ સંભાવનાઓ છે;

નજર સામે જ છે એ કેશ શ્યામલ, આંખ સતરંગી,

ફરી રંગાઈ શકવાની હજુ સંભાવનાઓ છે;

ગળામાં એક અટકીને ઊભું છે ગીત સદીઓથી,

ઉલટથી ગઈ શકવાની હજુ સંભાવનાઓ છે;

નવેસરથી ચલો, ભેગા મળીને ભાગ પાડીએ;

ડૂમો વહેંચાઇ શકવાની હજુ સંભાવનાઓ છે.