દૂર ક્યાંક!

શ્વાસો ટકાવવાના ધખારાથી દૂર ક્યાંક!

નીકળી જવું છે મારે મારાથી દૂર ક્યાંક!

 

કોઈનું કંઈ નથી તો હશે આપણુંય શું?

ચાલો ને જઈએ મારા-તમારાથી દૂર ક્યાંક!

 

ભાંગી પડાતું હોય છે એની વિદાયથી!

લઈ જા મને આ દૂર જનારાથી દૂર ક્યાંક!

 

લંબાવશે એ હાથ, ને મોં ફેરવી લેશે;

રહેવું સદાય એવા સહારાથી દૂર ક્યાંક!

 

અફળાયો ખૂબ, પણ પછી થાકીને આખરે;

દરિયો જતો રહ્યો છે કિનારાથી દૂર ક્યાંક!

 

મંઝિલ મજાની કોક મારી વાટમાં હશે!

પહોંચી જવાનું "પાર્થ" ઉતારાથી દૂર ક્યાંક!