સરદારનું ગીત - ૩૩
સરદારનું ગીત - ૩૩
બારડોલી સત્યાગ્રહ-૧ (ઈ,સ, ૧૯ર૮)
અન્યાય બારડોલીને, સરકારે કરેલ રે;
ને વધાર્યું મહેસૂલ, અન્યાયથી ભરેલ રે,
અનેક કારણો શોધી, આકારણી કરેલ રે;
પાકા મારગની એમાં, ગણતરી થયેલ રે,
વધારો ઢોર-વસ્તીનો, બાકી રહી ન જાય રે;
ઘણાં પાકાં મકાનોની, ગણતરી કરાય રે,
ગણ્યો ભાવ વધારાને, સમૃદ્ઘિનું નિશાન રે;
વધે ગણોતધારો તો, લેખાય ધનવાન રે,
જમીન આવકો તેમાં, સુધરેલ ગણેલ રે;
શોધીને કારણો આવાં, કર વધુ કરેલ રે,
પણ આકારણી આવી, ખોટી જાહેર થાય રે;
સરકાર કરે એવું, લોકો હેરાન થાય રે,
એન્ડર્સને કરી દીધો, એનો ખુલ્લો વિરોધ રે;
ને જયકરને દીધો, ભૂલોનો ખૂબ બોધ રે,
છતાં ગણોતધારામાં, તેઓની ભૂલ થાય રે;
તેથી વધુ મહેસૂલ, ત્રીસ ટકા કરાય રે,
પૂછયા જોયા વિના તેણે, આકારણી કરેલ રે;
તેથી વેરો નખાયો’તો, અન્યાયથી ભરેલ રે,
જાંચ સમિતિએ તેની, ઝાટકણી કરેલ રે;
રેવન્યુ મેંબરો પાસે, ખર્ચ આંક ધરેલ રે,
તાલુકાના કિસાનોની, સભા એક ભરાય રે;
વધુ ન ભરવો વેરો, એવો ઠરાવ થાય રે,
છતાં ધરે નહિ ધ્યાને, એ વાત સરકાર રે;
ને હુકમો વસૂલીના, પાડી દીધા બહાર રે,
મળ્યા વલ્લભભાઈને, લોકો લેવા સલાહ રે;
તેઓએ સાંભળી વાત, ચીંધ્યો કઠિન રાહ રે,
હો ભરવા ન તૈયાર, મહેસૂલ જરાય રે;
તો નિરંતર આપીશ, લડાઈમાં સહાય રે,
**
લોકોની જાણવા ઈચ્છા, આગેવાનો ફરી વળે;
તૈયારી સઘળી જોઈ, લડત કરવા મળે.
(ક્રમશ:)