શાકવાળો

આવો ભાયો ને આવો બેનડીઓ,

શાકવાળાની બૂમ પડી છે;

લેજો ઝૂમખડાં ને તૂરિયાંયે લેજો,

દૂધી પણ આ રૂપકડી છે.

ખરીદો તુવેર ને ભાજી ખરીદજો,

કોબીજ આ જાણે પાઘડી છે !

ભીંડો ને રીંગણું, મૂળો ને ડુંગળી,

ટમેટાંની છાલ રાતડી છે.

તાજી ફૂલકોબી ને સૂરણ છે મોટું,

ગુવારની સીંગ વાંકડી છે;

નિરાંતે લેજો ને સારું-સારું લેજો,

ચમકે ગાજરથી આંખડી છે.

ઓછું નહિ આવે, ખરાબ નહિ આવે,

શાકવાળાની એવી વાતડી છે;

તાજું-તાજું ખાજો ને તાજા-માજા રહેજો,

લીલોતરી એવી ફાંકડી છે.