સદગુરુ શરણ
સદગુરુ શરણ
શ્વાસે શ્વાસે સ્મરણ હરિનું
રામ રટણ છે રોમે
મનવા સદગુરુ શરણ ગ્રહી લે
જ્યાં ત્યાં જે તે પીધું મનવા
ભાન ભૂલી બહુ નાચ્યો
માનવતાનો માર્ગ ચૂક્યો
મિથ્યા ભ્રમમાં રાચ્યો
સત્સંગને જો પામ્યો છે તો
ભરભર પ્યાલા પી લે
શ્વાસે જેના રામ સ્મરણ એ
સદગુરુ સંગ રહી લે
મનવા સદગુરુ શરણ ગ્રહી લે
મીન પીવે જો સ્વાતિબુન્દ તો
અમૂલખ મોતી પામે
પ્રેમ સુધારસ સદા પીવાનું
ટાણું આપ્યું રામે
ભવભવની તારી તરસ્યું ટળશે
કેવળ નામ જપી લે
શ્વાસે રામ રટણ છે એવા
સદગુરુ વચન ચહી લે
મનવા સદગુરુ શરણ ગ્રહી લે
છળ્યું જગત, દાખી હોશિયારી
માન્યું જીત્યો બાજી
પામ્યો ચપટીક ખોયું અઢળક
વાત પછી સમજાણી
કૂડ-કપટ સઘળાં ત્યાગીને
સાધુ સંગ રહી લે
શ્વાસે શ્વાસે સ્મરણ હરિનું
રામ રટણ છે રોમે
મનવા સદગુરુ શરણ ગ્રહી લે.