પાનખરનું પર્ણ
પાનખરનું પર્ણ
વૃક્ષ પરથી પાંદડું ખરી પડ્યું -
મેં વિચાર્યું -
"વૃક્ષમાં આવી ગયું માણસપણું?"
જોઈને આ દ્રશ્ય દુઃખ પામ્યો ઘણું,
વિપત્તિમાં સાથ કોણે છોડ્યો?
જન્મ નો સંગાથ કોણે તોડ્યો?
સુંદર હતું, યુવાન- ઉપયોગી હતું,
ત્યાં સુધી જ શું હતા સઘળા સંબંધ?
પાનખર આવી, ને તૂટી ગયા પ્રેમબંધ?
ત્યાં જ મર્માળુ હસીને વૃક્ષ બોલ્યું- "આદમની હું જાત નથી!
વસંત હોય ત્યાં સુધી જ સાચવવાની વાત નથી!
કૂંપળ હતી એ ત્યારથી પાળ્યું હતું,
આફતોનાં પુર ને ખાળ્યું હતું.....
'નામ તેનો નાશ' એ સૃષ્ટિનો ક્રમ છે,
શાશ્વતીની વાત કેવળ ભ્રમ છે,
જાતે ખસીને અન્યને માટે કરો રસ્તા,
ફૂટી શકે નવપર્ણ તો હસતા હસતા,
પાનખર - ના શાપ ના વ્યવધાન - છે
નવજીવન માટેનું એ વરદાન છે.