વાટ લાંબી છે

વાટ લાંબી ને કઠીન છે પ્હોંચવાનું દૂર છે,

તો ય ના ચિંતા પથિકને ખાતરી ભરપૂર છે,

છે ચરણમાં જોશ હૈયામાં મિલનની પ્યાસ છે,

કંટકોને ફૂલ માને એટલો ચકચૂર છે ! 

કોઈ કહેતું ગાંડપણ ને કોઈ શ્રદ્ધા માનતું,

જે કહો, જેવો કહો, પરવા નહીં- મંજૂર છે !!

આવે કસોટી એ ઘણી ક્યારેક હિંમત હારતો,

તો ય આંસુ સારતો એ ચાલવા મજબૂર છે !

તું જ ખુદ સંભાળજે, તારી કને આવી રહ્યો,

સાંભળ્યું છે, તાવણીની રસ્મ તારી ક્રૂર છે,

પ્રેમથી કે સખ્યથી કે દાસ ભાવે ના મળે- 

કંસ ભાવે પામવા બંદો તને આતુર છે !!