ફરજ

ખોટા શોક ! ખોટી સાંત્વના,ખોટા દિલાસા,

નથી જોઈતી, મારે તમારી આશ વગરની આશા.

ચિતા બળે છે, બળ્યો દેહ મારો આજે ચિતામાં,

રડવા બેઠા છો શું મરેલ ને, જાણ્યો હતો જીવતામાં ?

આજે ઠાઠડી મારી ઉપાડી, કર્યો મોટો ઊપકાર,

રિવાજોના આ ભારા સાથે,મારો વધારાનો ભાર.

રામ નામ ને સત્ય બનાવ્યું, સ્મશાને દેહ જલાવ્યો,

આજે દુનિયાની શરમ કરીને પરાણે ધર્મ બજાવ્યો.

નહીં કહું કે ફરજ તમારી, તમે અધુરી મુકી છે,

જાવ ! છુટ્ટા તમે બંધનથી, તમારી મુક્તિ કરી છે.

મોક્ષ મળશે આત્માને મારી, અફસોસ છે એક વાતનો,

જીવતા મારા કશુંય કર્યું નહીં,મૃત્યુ પછીની ફરજ શા કામની?