ઓ જિંદગી, આવું શું કરે છે
ઓ જિંદગી, આવું શું કરે છે
આવું છું કહી જાય છે પછી પાછી ક્યાં આવે છે !
રહે છે મારી સાથે ને પાછી તું મુજને જ સતાવે છે ?
ઓ જિંદગી, આવું શું કરે છે !
સજાવવા તુજને આ બંદો જવાની ખુદની ખપાવે છે,
પહોંચું મથી ને કિનારે જરાક ત્યાં મુજને ડૂબાડે છે !
ઓ જિંદગી, આવું શું કરે છે !
જીવતરના શમણાં લીલાં ને પીળાં હરદમ બતાવે છે.
સાચા થવાને ટાણે જ મને તું ઊંઘમાંથી ઉઠાડે છે ?
ઓ જિંદગી, આવું શું કરે છે !
આજેય છું ને રહીશ હું કાલે જાણે એવું જ જતાવે છે.
ત્યાં જ અચાનક ભરી મહેફિલેથી ખુદને હટાવે છે ?
ઓ જિંદગી, આવું શું કરે છે !
હળવેથી કહું તો એક તું જ બધી મથામણ કરાવે છે,
પછી, અડધું મૂકાવી સઘળું આ જીવ ને જ બનાવે છે.
ઓ જિંદગી, આવું શું કરે છે !
દોડી પડું તવ આશરે, તું ભ્રમમાં જ એવા ભરાવે છે.
ખરે ટાણે એ ભ્રમણા તોડી મને મધદરિયે તરાવે છે !
ઓ જિંદગી, આવું શું કરે છે !
હશે તારી ય મરજી કાંઈક અલગ મારી એષણાઓથી,
મેં ક્યાં કરી હોય છે કોઈ જિદ, કે મુજને જ રડાવે છે !
ઓ જિંદગી, આવું શું કરે છે !