નાનકડી બારી

મારા ઘરની 

એ નાનકડી બારી વાટે,

ચળાઈને આવતાં રવિકિરણો

સાથે અનેરી તાજગીથી

ઊગતી સવાર,

એ બારીમાંથી દ્રશ્યમાન

ખુલ્લું આકાશ,

કરે છે સાદ મને

વિહરવા મુક્ત ગગને,

એ બારીએ વીતે

મારી મનગમતી સંધ્યા,

આથમતા રવિની સાખે

માળે પાછું ફરતું વિહંગગણ,

કૉફીના કપ સંગ

ગમતીલું પુસ્તક ને

મનનાં ઝરોખે હોય

પ્રીતમની વાટ,

બારીના ઝરોખે ઝીલું,

મેઘના એ ફોરાં,

નીરખું મેઘના મિલને,

તૃપ્ત અવનિની ભીનાશ,

ઊતરતી નિશાએ

શીતળતા અર્પે

સૌમ્ય ચંદ્રની ચાંદની

એ નાનકડી બારી વાટે.