મુંઝવણ મારી

મુંઝવણ મારી એ જ છે અસલમાં,

કૃષ્ણ સર્ચ નથી થઇ શકતા ગૂગલમાં,

ખોળીએ તો એની નામાવલિ મળશે,

ભળતા ને ય ગૂગલ સાથે સાંકળશે,

કેટલીય સાઇટ ખૂલી જશે એક પલમાં,

કૃષ્ણ સર્ચ નથી થઇ શકતા ગૂગલમાં,

મહીં, માધવ, મીરા, મેવાડ, મટકી...

શબ્દ ખોળી ગૂગલ અહીં જશે અટકી,

લઇ જશે ના એ કોઇ શબ્દના તલમાં,

કૃષ્ણ સર્ચ નથી થઇ શકતા ગૂગલમાં,

એમ કૃષ્ણ ગૂગલમાં જડવા લાગશે,

તો અહીં કંઇ કેટલાય જીવડા જાગશે,

રાત દિ' રત રહે છે જે આ સકલમાં,

કૃષ્ણ સર્ચ નથી થઇ શકતા ગૂગલમાં,

શ્યામે રાખી છે ક્યાં કહે તુજથી દૂરી,

ભીતર ઝાંક શ્યામ બજાવે છે બાંસૂરી,

બસ રાખ્યા છે તે જ એને ઓઝલ્માં,

કૃષ્ણ સર્ચ નથી થઇ શકતા ગૂગલમાં.

('વળાંકે વળાંકે વનમાળી' માંથી)