મોબાઈલમાં ખીચડી

ચકો-ચકી બેઠાં-બેઠાં

વાતોના પુલ બાંધે છે,

આ માણસને જુવોને,

મોબાઈલમાં ખીચડી રાંધે છે.

આપણે તો મગદાળ-ચોખા

ને પાણી-મીઠું લેતાં'તાં,

આપણી આ વાર્તાઓ તો

નાનાં બાળકોને કહેતાં'તાં,

પણ અત્યારે તો ચેટીંગ-મેટીંગનો

સામાન સૌના કાંધે છે,

આ માણસને જુવોને,

મોબાઈલમાં ખીચડી રાંધે છે.

આપણે કંઈ ભૂલ કરીએ

તો રાજા ત્યારે દંડે છે,

આપણી સચ્ચાઈની કથા તો

ફેલાણી સાતે ખંડે છે;

પણ મોબાઈલ

ખીચડી પકવવામાં

ઘણા બેઠા વાંધે છે,

આ માણસને જુવોને,

મોબાઈલમાં ખીચડી રાંધે છે.