મૌન
મૌન
ક્યાંક કશુંક અથડાયા કરે છે,
શું હોઈ શકે એ શોધું? .
શોધ્યું ખૂબ શોધ્યું
આમ તેમ આસપાસ.
મળ્યું તો ખરું પણ
ના ગમતું પરિણામ.
શું હોય એ કહો ચાલો
શું કહેશો? મૌન જ તો છે.
આ મૌન જ છે જે અથડાય છે
આમ તેમ, આસપાસ, વિટળાયા કરે.
ના કહેવાયેલી લાગણીઓ, શબ્દો
મૌન બની ચોમેર વહ્યા કરે.
ખરું ચક્રવ્યૂહ છે આ મૌનનું
જીવન મૌન , મૌત પણ મૌન
લે એમાં અચરજ શાની?
આવ્યું કદી પૂછી ને જન્મ કે મૃત્યુ?
ના જ આવે ને પૂછી ને
પૂછે તો મૌન શાને કહેવાય?
ક્યાંક કોઈ શું કહેશે ના ડરથી મૌન,
ને ક્યાંક અભિમાનના સાદથી મૌન,
અંતે અથડાય તો છે જ ને
શાને મથે છે આટલું?
બહાર ચોમેર ડોળાય આ મૌન,
ને ભીતર અથડાય આ મૌન,
ક્યાંક કશે અથડાયા કરે છે,
ક્યાંક કશે અથડાયા કરે છે,
મૌનની માયાજાળમા વીંટળાયા કરીએ છીએ,
અથડાયા કરીએ છીએ.