કોણે બનાવી પીડિતા મને ?

હે નાથ ! બે કર જોડી પૂછું આજ,

કોણે કીધી પીડિતા મને ?

શક્તિનું સ્વરૂપ અને અગ્નિ પરીક્ષા ?

દ્રોપદી, સતીને, અનસુયાના નામે,

કોણે કીધી પીડિતા મને ?

દહેજ, પરદાને, દૂધપીતી કીધી,

બાળલગ્ન ને સતીપ્રથાના નામે,

કોણે કીધી પીડિતા મને ?

આટલાં વર્ષો પીડા વેઠી પણ, 

આઝાદી પછી પણ, ગુલામી વેઠી, 

કોણે કીધી પીડિતા મને ?

કૂખમાં મારી, જગ જોવાથી વંચિત રાખી,

ઘરકામના નામે અશિક્ષિત રાખી,

કોણે કીધી પીડિતા મને ?

વિધવા, વાંઝણી, અભાગણ,

અબળાને, ગણિકા જેવા ઉપનામે,

કોણે કીધી પીડિતા મને ?

જાતિભેદ, અપમાનો ધરી,

બળાત્કારે સંહાર કરી,

કોણે કીધી પીડિતા મને ?

સહનશીલતાની મૂર્તિ કહી,

અન્યાય સહેવા મજબૂર કરી,

ઘરેલું હિંસાના નામે,

કોણે કીધી પીડિતા મને ?

સદીઓથી આ રીતી ચાલી આવી,

આંચળમાં દૂધ, આંખોમાં અશ્રુ સમાવી !

કોણે કીધી પીડિતા મને ?

જગને પૂછું બે કર જોડી આજ, 

મુકો તમ આતમે હાથ, પછી કહો,

કોણે બનાવી પીડિતા મને ?