કલાકાર
કલાકાર
લઈ પીંછી રંગો તણી એ સપનાઓ ચીતર્યા કરે,
કાગળના આંગણમાં એ શબ્દોનાં મોતી વેેેર્યા કરે,
કહ્યો કોઈએ ઘાયલ તો ગણ્યો કોઈએ પાગલ,
કલાકાર છે એ કે કલાનાં ઓજસ પાથર્યાં કરે,
ઝાકળ એનું મિત્ર અને મૃગજળ સાથે નાતો એનો,
પાનખરના પુષ્પો સાથે એ પ્રીત અનેરી કર્યા કરે,
અનંત આ તારા ભરેલું આકાશ ને એનું એ એકાંત,
નવી કલ્પનાઓનાં મોજાંઓમાં નિત એ, તર્યા કરે,
આવડત છે એની કોઈના આંસુઓ પારખવાની,
પણ એની મૂંગી વેદના તો આંખોમાંથી વહ્યા કરે.