ખ્યાલ

આટલો જ ખ્યાલ રાખ્યો છે તો થોડો વધારે રાખી લે ને !

અમથું અમથુંય આ તારા ખ્યાલ નું માન રાખી લે ને !

એ સાચું છે કે મારી દુનિયા તો છોડીને નહિ આવીશ હું,

તારી એ દુનિયામાં કોઈકવાર મારોય મુકામ રાખી લે ને !

સોગઠાં તો ગોઠવી જ દીધા છે નિયતિએ જુદાં તારાં મારાં,

ક્યાંક, કદી એનાય છેડા અડી જાય એવી વાત રાખી લે ને !

હા, ખરું છે કે જાળવવી જ રહી સરહદો દુનિયા કેરી હવે,

પણ, હદોનીય પેલે પાર કોઈ એક મુલાકાત રાખી લે ને !

અજબ છે આ લાગણી ને વિવશતા હ્રદયની અટારીએ,

તારી સુગંધને માણવા જ ખુલ્લી એક બારીય રાખી લે ને !

વાતો કરીને શું કરીશું ખાલી કે એ વાતોની વાત રહી લાંબી,

આપીને વિરામ એ અધરને, જરા મારી સમીપ રાખી લે ને !

મટકું ય નથી માર્યું તને નીરખતા રહ્યામાં અમે હમણાંથી,

ન આપ આવી વ્યથા, મને તુજ આંખોમાં જ રાખી લે ને !

કાયમ છે આ કહાણી ને હજુ દિસતો નથી અંત એનોય,

તો નાયિકા બની મજાની મને પણ નાયક તું રાખી લે ને !