ખંજન ને ખાડા

એ જરાક અમથું મલક્યા ત્યાં

ગાલના ખાડામાં પોલાણ સર્જાણું

જેમ હળવેકથી એક  કૂણું -કૂણું

વમળ પાણીમાં લહેરાણું

જોઈ -જોઈ અમારું હૈયું  

એવું હરખાણું

જાણે પેટમાં એક મનમોજી 

પતંગિયું ફસાણું

આ ક્રમ ઝાઝો ચાલ્યો ને

જીવન અમારું બદલાણુ

એ એમના રસ્તે ગુમ એમની

ખોજમાં અમારા પગમાં છોલાણું

ઘણા વર્ષો બાદ મળ્યા એ ખંજન  જેના

પોલાણમાં હતું એકનું એક દિલડું ખોવાણું

ધારી ધારીને જોયું કે  ગાલના ખાડાને

ઝાંખો પાડે એવા આંખના ખાડામાં કૈક દેખાણું

ખબર પૂછતા ય અમારું

તો નાદાન મન કચવાણું

રહી રહીને સવાલ થાય છે કે 

એ ખંજન ખાડામાં કેમનું ફેરવાણું ?