ખાખી

રંગ તો બધા પહેર્યા હશે કદી ખાખી પહેરી તો જુઓ,

પછી નસેનસમાં દોડશે એ અજબ ખુમારી તો જુઓ.

મન મારું ખાખી અને આખુ તન મારું ખાખી પછી,

રંગાય સઘળું ખાખીમાં આ વર્દીની ખુદ્દારી તો જુઓ.

સમય આવ્યે જાન આપું, મારા હૂંફાળા શ્વાસ આપું,

શાનથી થાઉં વતન પર ફના આ કુરબાની તો જુઓ.

દિલમાં સપનાં દફનાવી જવાબદારી પલકો પર સજાવી,

લપેટાય ભલે તિરંગામાં ખાખી આ ખમીરી તો જુઓ.

બરફ હોય કે સરહદ, વરસાદ હોય કે પછી વાવાઝોડું,

જનજનની રક્ષા કરતા આ યોદ્ધાની બહાદુરી તો જુઓ.