જઈએ

ઝરણાંની જેમ, ખળખળ વહેતાં જઈએ,

રસ્તો એમ આપણો, કરતાં જઈએ !

દિશાહીન બનીને, માર્ગ ભૂલાય છે,

કેડી કોઈ, આપણી કંડારતાં જઈએ !

રંગબેરંગી ફૂલોથી, મઘમઘે છે ઉપવન,

સત્કાર્યની સુવાસ, ફેલાવતાં જઈએ !

રોશની ભગાડે છે, તિમિર અંધકારને,

દીપક શ્રદ્ધાનો, સળગાવતાં જઈએ !

હતાશા જો ઘેરી વળે, ચારેકોરથી એમ,

આશાનો સંચાર મનમાં, કરતાં જઈએ !

અશક્ય નથી કશુંય, આ જગતમાં,

મનોબળ મક્કમ એવું, ઘડતાં જઈએ !

જીવતાં જીવતાં કદી, થાકી જવાય તો,

'ચાહત' બનીને, અમર થતાં જઈએ !