ઝાકળ

આજે દીકરા તું વઢ્યો કે તારા પેટમાંથી વહુ,

મારી આંખે જે બાઝ્યુ એને ઝાકળ, એવું કહું ?

પાપા પગલી તું કરતો, પડી જવાય તો તું રડતો.

ને તારી માની આંખે છવાતું એને ઝાકળ, એવું કહું ?

શ્રદ્ધા મારી સવાર જેવી ને અપેક્ષાઓ સાંજ.

તડકો થતાં છે ઉડી ગયું એને ઝાકળ, એવું કહું ?

જ્ઞાનનો મને અહમ હતો કે અહમ મારું જ્ઞાન,

સત્યને આડે આવરણ હતું એને ઝાકળ, એવું કહું ?

મને તારા પર પ્રેમ હતો કે હતો પ્રેમનો વહેમ,

હકીકતમાં જે છળી ગયું એને ઝાકળ, એવું કહું ?