જાય વીતી આ જિંદગી

જાય વીતી આ જિંદગી ટૂંકી, પવનની જેમ જાય,

કાળ જાય છે એને ફૂંકી, પવનની જેમ જાય !... જાય વીતી.

કોઈ બાલક બનીને ચાલતા,

કોઈ ચાલે જુવાનીમાં મ્હાલતા;

પેલા વૃદ્ધજનોયે ચાલે, પવનની જેમ જાય !... જાય વીતી.

કૈંક બ્રહ્મા ને દેવતા થઈ ગયા,

કૈંક રાજા ને રુદ્રમાં વળી ગણ્યા;

પછી માનવીની વાત શી થાય; પવનની જેમ જાય !... જાય વીતી.

થાય મોડું એ પહેલાં ચેતજે,

મળ્યું અમૃતફળ તેને સેવજે,

થઈ પૂરણ સંસારથી જાય; પવનની જેમ જાય !... જાય વીતી.

બની ‘પાગલ’ પ્રભુ કેરા પ્રેમમાં,

જ્ઞાન નાવને ચલાવજે નેમમાં;

કાળ તો તો ગુલામ ખરે થાય; પવનની જેમ જાય !... જાય વીતી.

- શ્રી યોગેશ્વરજી