હું માણસ છું ?

ચહેરો જોઈ અજવાળાં દેતો,

હું ફાનસ છું

સ્વાર્થ નામના સરનામે વસતો,

હું માણસ છું ?

સકળ સૃષ્ટિને છેતરતો, 

હું કુદરતથી પણ માહેર છું

ચપટી ચોખા ધરી, ભંડારા માંગતો 

હું માણસ છું ?

ખાલી ખિસ્સાથી જોજન દૂર ને,

ભરેલાને ભેટવામાં, હું કાબેલ છું

ફાયદામાં પાકો ને વાયદામાં કાચો,

હું માણસ છું ?

તખતીમાં નામ મઢાવવા, 

લાખોનું દાન કરતો હું જગ જાહેર છું

ભીખ માંગતા બાળને પાઈ માટે તરસાવતો

હું માણસ છું ?

સાગ સમી આ દુનિયામાં ફાટેલો 

ઉઘઈનો હું રાફડો છું

માનવ થઈ માણસાઈ ને કોચતો

હું માણસ છું ?