હોય તોયે ઠીક છે

દૂર છે એ જેટલો, નજદીક છે !

તોયે છેડો ફાડીને નાસી જશે એ બીક છે !

ઘર મહીં, શેરી મહીં, પાદર મહીં

છે બધે ખતરો જ છે, છે વાયરસ, વૈશ્વિક છે !

હું જ છું તલવાર ને હું ઢાલ પણ

કોઈ ના સેનાપતિ, સઘળા અહીં સૈનિક છે !

બંધ બાંધી જળને બાંધ્યું તે છતાં

સારું છે, નિકાલ કરવા, બે બનાવી નીક છે !

બોદું બોદું વાગે મર ને ઢોલકું !

આવવાનું ને જવાનું શ્વાસનું દૈનિક છે !

ના કલમ, ના દોત, ના લહિયો મળ્યો

સાંભળો મારી કથા: મારી કથા મૌખિક છે !

આયનામાં ક્યાં 'હરિ' દેખાય છે?

ઠીક છે કે એ નથી ને હોય તોયે ઠીક છે !