ના અટક : તરહી ગઝલ

ખૂબ ઊંડે છે કશી ખળભળ બકા !

એટલે આંસુ વહે ખળખળ બકા !

હાથ બાળ્યા છે બળ્યા બંનેય મેં

આંચમાં: ધગધગ સીસું ફળફળ બકા !

એષણાનો નાગ ફૂંફાડી રહ્યો

રોમ રોમે રેશમી સળવળ બકા !

કેટલા કોલાહલો, ક્યાંથી જીવાય?

મૌનની ચિચિયારીઓ સાંભળ બકા !

ક્યાંય પણ અણસાર એનો ના મળ્યો

જોયું મેં આકાશ ને જળ, થળ બકા !

થઈ ગઈ ધીમી ધમણ, મીંચાઈ આંખ

શ્વાસ છૂટયા ને ખૂટ્યા અન્નજળ બકા !

છે 'હરિ' કે છે જ નહીં, માની લઈ

ના અટક ને કર કશી અટકળ બકા !