હિસાબ માંગે છે
હિસાબ માંગે છે
લાગણીનો પણ લોકો તો હિસાબ માંગે છે,
જો મદદ કરે તો એનો ખિતાબ માંગે છે.
રોજ રોજ બદલાવે છે ચહેરા જે લોકો,
આયના સમક્ષ એ લોકો નકાબ માંગે છે.
મૌલવીને એથી તો ખાર છે ફકીરો પર,
એ ખ઼ુદાની સામે પીવા શરાબ માંગે છે.
છે નિયમ કેવો લોકોનો અહીં અવળચંડો,
અંધકાર આપીને આફતાબ માંગે છે.
જીંદગી ય કાવાદાવામાં જાય છે આખી,
અન્યના જીવનની ખુલ્લી કિતાબ માંગે છે.
જે જગાડે છે રાતો મારી ઊંઘ ચોરીને,
રાતભર એ જોવા મારું જ ખ્વાબ માંગે છે.
જીવતાં નથી લોકો વર્તમાનમાં તો પણ,
આખરે તો મૃત્યુ પણ લાજવાબ માંગે છે.