અતિની ક્યાં કોઈ ગતિ છે

અતિની ક્યાં કોઈ ગતિ છે ?

જેટલા મસ્તક એટલી મતિ છે,

પરાણે ચિતા પર ચડાવી દે જેને,

એ સ્ત્રી ખરેખર સતી છે ?

ચાહત પર તું આમ શંકા ન કર,

કોને ખબર છે શું નિયતિ છે,

પછડાટે એટલું તો જરૂર સમજાયું,

જીવનમાં ચડતી અને પડતી છે,

સ્મશાન વૈરાગ્ય ક્ષણનો જ હોય,

માથું મુંડાવે એ બધા જતી છે ?

પ્રેમભરી નજર પડે જો કોઈ પર,

કુબ્જા પણ અનુપમ રતી છે,

તું ભલે ને રિસાય મારાથી, 

કહે આ લાગણી કોના પ્રતિ છે ?

ચાલ અંતિમ દાવ લગાવીએ પ્રેમમાં,

મારી તો બાજી સાવ ચત્તી છે,

ખામોશી તારી શબ્દોથી વધુ કહે છે,

જાણું છું કે મૌનમાં જ સંમતિ છે,

એક સીમા પછી શબ્દો લાચાર છે,

શબ્દોની પાર દિલની અનુભૂતિ છે,

સહજતાથી ફુટવા દે પ્રેમની કૂપણને,

આખરે તો પ્રેમ જ પ્રકૃતિ છે.