ગઝલ - શકું

કોઈ રીતે અશ્રુ અટકાવી શકું,

યાદ તારી કેમ થંભાવી શકું ?

શ્વાસ મારા એમ મહેકાવી શકું,

શ્વાસે શ્વાસે નામ હું લાવી શકું.

 

એટલે ખુદને ન ભરમાવી શકું,

પ્રેમમાં ક્યારેય નહીં ફાવી શકું.

તારાં જીવનમાં તો, દૂરની વાત છે,

કલ્પનામાં પણ ન હું આવી શકું.

બંધ કર્યા છે તેં બારી બારણા,

દિલમાં તારાં કઈ રીતે આવી શકું ?

સીધેસીધું કાંઈ કહી શકતો નથી,

શેરમાં ગીતાય સમજાવી શકું,

શબ્દ ને સંવેદનોના સંગમાં,

હું નવા અવતારમાં આવી શકું.