ગૌરવના સંકેત
ગૌરવના સંકેત
આંગણ, ઉંબર, વાડો શોભે, શોભે ગરવા હેત,
ઘરનો ઝૂલો ઠેક ભરીને કાનોમાં કહી દેત,
આ તો ગૌરવના સંકેત…
ગાર-પથ્થરની ભીંતોમાં ધરબાયેલો ટહુકો,
ઘરના મોભે નળિયા સાથે અથડાયેલો લહેકો,
આજે પણ એ ખટકણ ઘરનું ખમ્મા ખમ્મા કહેત,
આ તો ગૌરવના સંકેત...
સૂપડાં, સૂંડલા ખાલી ભીંતે ઘરની વાતો કહેતા,
ઘંટીના બે પડખા વચ્ચે ખેતર સંઘરી રહેતા,
ખાંડણીયામાં સાંબેલું તો ચાલત અધ્ધર વેંત,
આ તો ગૌરવના સંકેત…
દાદર સાથે ઘરનો મેળો આજેય ઉતરી જાતો,
પાણીયારા પથ્થર ઉપર આનંદ ઉભરી જાતો,
ટમટમ થાતો ગોખનો દીવો ઓવારણાં લઈ લેત,
આ તો ગૌરવના સંકેત.