એકજ દાવમાં ક્યાં જીતી શકાય!

આ જિદ્દી મનને ક્યાં સમજાવી શકાય છે !

આ દિલની વ્યથા અને વેદનાઓને,

ક્યાં આમ પાણીમાં વહાવી શકાય છે !

તમે તો કિંમતી કંચન અમે તો કથીર છીએ,

પણ અમારી જાતને ક્યાં, તમારી સાથે સરખાવી શકાય છે !

અહી તો જ્યાં જુવો ત્યાં હરીફાઈ છે,

મારાથી એમાં ક્યાં ફાવી શકાય છે !

અમે તો રહ્યા પાનખરના છોડ સાવ,

આમ મારી ડાળખી પર ક્યાં ફૂલ ખીલવી શકાય છે !

આ પાગલ દિલ માનતું નથી રિવાજો એ જાણતું નથી,

આમ આ બેકાબૂ બનેલા મનને ક્યાં મનાવી શકાય છે !

ભલેને હોય અઢળક પ્રીત હૈયે એના માટે,

તોય એને ખરા દિલથી એને ક્યાં અપનાવી શકાય છે !

આ ભર નિંદ્રામાં સુતું છે ભાગ્ય મારું,

આમ એકજ દાવમાં ક્યાં એને જગાવી શકાય છે !

નિભાવવા પડે છે સંબંધો ગમે તેવા હોય,

આમ સંબંધોની જંજીરને ક્યાં સરળતાથી ફગાવી શકાય છે !

મનના દ્વારે આવે છે લાખો નકારાત્મક વિચારો,

આ મનનાં દ્વારે ક્યાં કોઈ તાળું લગાવી શકાય છે !