એક નામ

એક નામ જ્યાં ગજવામાં ઘાલ્યું.

પહેરણનું પંખી તો હૅંગરથી છટકીને,

આકાશે ઉડવાને ચાલ્યું.

આખી સોસાયટી અચરજથી પૂછે કે,

તાજો બગીચો ક્યાંથી લાવ્યા ?

છોકરો મલક્યો કે ડામરને રોડ નહી,

કાચા મારગમાં થી આવ્યા !

ઓડી-ઈનોવાના મોહ બધા મુકીને,

માફાળા ગાડાને ઝાલ્યું !

એક નામ...

જીન્સના જંગલમાં ઘાઘરીની ઉઠબેસ,

એવી તો મીઠડી લાગે.

પેપ્સીને લીમ્કાના સ્વાદ સૌ ભૂલીને,

દૂધની થેલીઓ માગે !

તંબોળી પાનનું આખુંયે ઝાડ,

બારીની પછવાડે ફાલ્યું...