એક ખૂણે રોયા કરીએ

અમને અળગાં કરી આપ છોડી ચાલ્યાં,

એકલાં તડપવા અંધકારમાં,

બીજું તો શું કરીએ ? 

બેસીને એક ખૂણે રોયા કરીએ.

અંધારે ઓરડે એક દીવડાની જ્યોતિ,

એને થપાટે થપાટે ઓલવ્યાં કરીએ,

બીજું તો શું કરીએ ? 

બેસીને એક ખૂણે રોયા કરીએ.

કાળજાંની કદર તેં કદી ન કીધી, તોય,

ધબકારે ધબકારે નામ પરોવ્યા કરીએ,

બીજું તો શું કરીએ ? 

બેસીને એક ખૂણે રોયા કરીએ.

રાખી તિજોરી મેં તારા સ્મરણોની,

એ સ્મરણમાં સ્વયંને ખોયા કરીએ,

બીજું તો શું કરીએ ? 

બેસીને એક ખૂણે રોયા કરીએ.

આપી ગ્યા આપ જે યાદો સોહામણી,

આંસુઓથી નિત એને ધોયાં કરીએ,

બીજું તો શું કરીએ ? 

બેસીને એક ખૂણે રોયા કરીએ.

આપના પદ છાપ જોયાં કરીએ,

બેસીને એક ખૂણે રોયા કરીએ,

બીજું તો શું કરીએ ? 

બેસીને એક ખૂણે રોયા કરીએ.