દીકરી

દીકરી એટલે

કોઈક વૈશાખી ઊની

બપોર, તો કદીક.....

શરદપૂનમની શાંત,

શીતળ ચાંદની.

દીકરી એટલે

શિયાળાની સવારે પુષ્પની,

પાંખડી પરનું ઝાકળ, તો કદીક.....

ફરરર્ ફરરર્ વાતો વાસંતી વાયરો.

દીકરી એટલે

ભીની ભીની સાંજે આભે ઉભરાતું

મેઘધનુષ, તો કદીક.....

ખળખળ વહેતી સરિતાનું

સૂરીલું સંગીત.

દીકરી એટલે

સાગરની ભરતીએ કાંઠે ટકરાતું

ઘુઘવતું મોજું, તો કદીક .....

નિર્દોષ નિખાલસ

માસૂમ મોહક પતંગિયું.

દીકરી એટલે

એક કાંકરીચાળે સરોવરમાં

ઉઠતાં તરંગ, તો કદીક.....

હાથની બંધ મુઠ્ઠીમાં

પકડેલી રેત.