ચાલને ફરી પાછા જઇએ
ચાલને ફરી પાછા જઇએ
ચાલ ને ! ફરી પાછા જઇએ,
સાંજ ફરી એ માણી લઇએ.
આથમતા સુરજની પહેલાં,
ને ખીલતી સંધ્યાની સાખે,
એકબીજા નાં ઝાલી હાથ આ,
વનની સીમાઓ ખેડી લઇએ.
માળે પાછા ફરતા એ પંખી,
વાડે પાછા ફરતા એ ગૌધન,
ધીમા ટહુકે કળા કરતા એ
સુંદરતા મોરની નીરખી લઇએ.
ખળ- ખળ વહેતા નીર નદીનાં,
સ્પર્શ પગે એ માછલીઓનાં,
ઝરમર મેઘ એ માટીની સોડમ,
શ્વાસ થકી આ હૃદયમાં ભરીએ.
પૂર્ણિમાની રાતે જોને નભમાં,
ચંદ્ર ખીલ્યો એ પુર્ણ કળાએ,
ખીલ્યા ચાંદની એ ચાંદનીમાં,
મન ભરી ને જીવી લઇએ.