અગમનો અણસાર

જોયો નથી તને, કદિ જાણ્યો નથી,

તો ય બંધ આંખે રહ્યો દેખાય..!

આ કરામત તે કેવી રીતે કરી ?

કૌતુક આ કોલાહલની દુનિયા મધ્યે,

પલભર મૌનમાં તું શાશ્વત સુણાય..!

આ કરામત તે કેવી રીતે કરી ?

તરસ તું, જલ તું, તું જ એનો પીનાર

તું પીવડાવે ને પ્યાસ મારી બુઝાય..!

આ કરામત તે કેવી રીતે કરી ?

થવાં સાકાર, શબ્દ બની કલમે રોપાતો

મુજ થકી તુજ કવન અદ્દભુત રચાય..!

આ કરામત તે કેવી રીતે કરી ?

છૂપાતો ફરે કરી લ્હાણી સુગંધની,

'દીપાવલી' નાં બે શ્વાસ વચ્ચે તું સધાય..!

આ કરામત તે કેવી રીતે કરી ?