આવને અલ્યા અલબેલા અષાઢ …
છેડવા ભીંના વ્હાલપના પાઠ ,
આવને અલ્યા અલબેલા અષાઢ .
મોરલા બપૈયા ચાતકનો તલસાટ
અષાઢી વીજના વાવડ પવનખાટ
કળાયેલ ટહુકા વાલમિયા મિજાજ
આવ , આવ અલ્યા અલબેલા અષાઢ.
ઘનઘોર છવાયો આભલાને માળ
કામણાં ભીંજવે જ સાંબેલાની ધાર
ઝરમર ઝીલે નવોઢાનાં દ્વાર..
આવ ,આવ અલ્યા અલબેલા અષાઢ
ધરણી મ્હેંકી ઝીલી ભીંની રે છાંટ
નટખટ ઝાડવાં નિખરે ઊભી રે વાટ
ભીંના પાલવડે લપટાવું શર્મિલા લાડ..
અંગે મઢું બુંદે મારા રસિલા અષાઢ.
પ્રાથુ ભાવે , હૈયે ગાજતા મેઘા જગન્નાથ
દોડે જલધાર, ડુંગરા શિવા અષાઢ.
લપસું સરવરીયા પાળ ભૂલીને ભાન,
ભીંજવી ગયો ઘનઘોર અષાઢી ઠાઠ.
ગાજ , ગાજ અલ્યા અલબેલા અષાઢ (૨).
રમેશ પટેલ(આકાશદીપ)