આખર લહરી
આખર લહરી
તારા થકી તું જ રહું ઉપરી,
તને કેળવું કે મેળવું ઓ સહચરી !
તારી જ તો સાંભળવી રહી હંમેશ કરમકહાણી,
જીવવા ન દઉં ત્યાં લગી તું ભરથરી !
પિતૃસત્તાક સમાજ જ છે ગુનેગાર,
વરના, તને પડી હોત ટેવ કહે કરગરી !
તારી જ લાઠી ને ભેંસ પણ તારી,
સુધર હવે તો રાજન ભર્તૃહરિ !
કપટ કરવા નથી તું શકુનિ, કે નથી
હું પાંડવોની દ્રૌપદી બહુચરી !
કૃષ્ણા છું કૃષ્ણની સખી સંગિની,
આત્મહત્યા કદાપિ નૈં, જાણું હત્યા કરી !
સાચવજે તું જ મુજથી તારું શીલ,
ફેરાફેરીમાં ન ઘવાય ક્યાંક કોઈ હરી !
'દરકાર છે' બબડી કેટલો થશે તું વામણો,
જોમ બિસ્તર સિવાય પણ કાઢ વાપરી !
નહીં ભૂંસી શકું લેબલ નામર્દનું હે ધણી !
શીખ પહેલા આપતા માન સખીને તારી !
ગીતાજ્ઞાન તારું ઢૂંકડું, પોથીભર ઉમટતું,
માનવ પણ ન થૈ શક્યો, દૈ પરીક્ષા અઘરી !
મરજીવા નથી હોતા સઘળાં ડૂબકી મારનારા
અસલ નકલ પારખવા નથી તું સાચો ઝવેરી !
રે કર્યો માફ, જા, જીવી લે જિંદગી નવી,
કરતાર લૈ ભટક ના, બોધવચનો સંધરી !
સંદર્ભ ખોદી ખોદી ન પીંખીશ વિહંગ આ,
'તરંગ' તો છે મનમોજી ને આખર લહરી !