આજ હરખ કરે છે હૈયું
આજ હરખ કરે છે હૈયું
આજ હરખ કરે છે હૈયું...
લીલાછમ પ્રાંગણ મધ્યે
ગાય ગીતડાં વૃક્ષો
કદી તડકો કદી છાંયડો
કલબલ ઝીલતી ભીંતો,
વહેંચતું ખુશી ખજાનો છૈયું
આજ હરખ કરે છે હૈયું
છૂટે શાળા ને લેવા આવે
અલક મલકના વાલી
નથી અંતર ખંડખંડના
માણું ભાષા મીઠડી કાલી
મઘમઘ સુખ ટપકતું છૈયું
આજ હરખ કરે છે હૈયું,
યાદ અપાવે બચપણ મારું
છત્રી હોય તોય પલળતાં
દોડે ભૂલકાં ચૌટા મધ્યે
ખુશી વણઝાર સંવરતાં
મધુર ક્ષણોની યાદ એ છૈયું
આજ હરખ કરે છે હૈયું
ના ભાગતી જિંદગી દોડતી
બસ હળવાશનો એ પોરો
ગોળ ઘી ને ગરમ રોટલો
નાની પતંગ ને દોરો
ભાવે ભીજાયું એ બોખલું છૈયું
આજ હરખ કરે છે હૈયું.