આદત છે

હા, હજી આદત છે મને,

જૂના થોથા ફંફોળવાની;

પીળારચક પ્રુષ્ઠોમાંથી,

લીલી લાગણીઓ તારવવાની.

ક્યાંક મારા જ ટાંકેલા શબ્દો,

ફરી ફરી વાગોળવાની;

ખુદ સાથે ગુફ્ત-ગુ કરી,

અંતરના ઊંડાણમાં ડૂબવાની.

અકથિત વૃતાંતમાં,

મોકળા મને ચુપચાપ વહેવાની; 

માયિક જાળમાંથી ઉગરીને,

કર્મ બંધન જ ખેડવાની.

નિસ્વાર્થભાવે નિર્મળ હાર્દ અર્પી,

સાત્વિકતામાં રહેવાની; 

શાબ્દિક જંજાળ નેવે મુકી,

અન્યને હૂંફ દેવાની.

શુષ્ક સંબંધોમાં સતત સ્નેહરૂપી,

ભિંજાશ સિંચાવાની; 

સ્વ પ્રાથમિકતા એળે રાખી,

અન્યને આનંદિત કરવાની.

સ્વબળે આકરા રસ્તા ઓળંગી,

નિશ્ચિત મુકામ પામવાની;

છતાં આદત હજી છે મને,

પ્રેમમાં સમર્પિત થવાની.