આ માણસ છે મજાનો
આ માણસ છે મજાનો
હોઠે હસતો, હૈયે રડતો, આંખે છે અરમાનો,
કોઠે વસતો લાગણીઓનો મોંઘેરો ખજાનો,
આ માણસ છે મજાનો…
અદની કાઠીમાં ભડભડતો આનલ સંઘરી બેઠો,
મનની વાંકી ગલીઓમાં પણ હિંમત સાથે રહેતો,
ક્યારેક મોટાભા’ થઈ ફરતો, ક્યારેક રહેતો નાનો,
હોઠે હસતો, હૈયે રડતો, આંખે છે અરમાનો,
આ માણસ છે મજાનો…
વાત-વાતમાં પડતું વાંકુ, વાત-વાતમાં મોજ,
માણસ નામે મરજીવો થઈ કરતો રહેતો ખોજ,
જોર-શોરથી ગામ ગજવતો, ક્યારેક રહેતો છાનો,
હોઠે હસતો, હૈયે રડતો, આંખે છે અરમાનો,
આ માણસ છે મજાનો…
ઘડી-ઘડીમાં બદલાતું મન, બદલાતું આ સ્પંદન,
નિત-નીત આ મનનો ડુંગર કરતો રહેતો વંદન,
છાતી કાઢી ફરતો જાણે કુદરતનો પરવાનો,
હોઠે હસતો, હૈયે રડતો, આંખે છે અરમાનો,
આ માણસ છે મજાનો…
દુ:ખડાં દેખી પાંપણોની પાળ છલોછલ ભરતો,
સુખડામાં એ બહેકી જાતો, ઉચ્છલ-ઉચ્છલ રહેતો,
ક્યારેક મોભો મેળવતો ને ક્યારેક હોય નિશાનો,
હોઠે હસતો, હૈયે રડતો, આંખે છે અરમાનો,
આ માણસ છે મજાનો.