యజమాని కోసం

ఋతువులు మారుతున్నాయి

చెట్లు మోడుగా మారుతూ

మళ్లీ వికసిస్తున్నాయి

ఆవలి తీరం వైపుకు చూస్తూ

యజమాని కోసం నిలబడింది

ఎవరైనా బాటసారులు కనిపిస్తే

వారి చుట్టూ తిరిగేది

దయుంచి నాలుగు మెతుకులు విదిలిస్తే

అవి తిని మళ్లీ అక్కడే ఉండేది

యజమాని రాకపోతే

అనే ధ్యాస లేదు

ఏ రోజైనా వస్తాడని

వార్థక్యం వచ్చే వరకూ 

చివరి శ్వాస విడిచేటప్పుడు

కొలనులోకి తొంగి చూసి

యజమానిని గుర్తు చేసుకుంది

ఎవరో తల మీద చెయ్యి వేసినట్లు 

ప్రేమగా పిలిచినట్లు

అనుభూతి కలిగింది

అది యజమాని స్పర్శలా అనిపించింది

కళ్ళు మూసుకుని 

చిన్నగా నవ్వి మళ్లీ కళ్ళు తెరవలేదు